नेपालमा धमाधम खोप भित्रिदै
काठमाडौं । मोडेर्ना कम्पनीले कोरोना भाइरस विरुद्ध उत्पादन गरेको खोप शुक्रबार पहिलो पटक नेपालमा आउँदै छ । स्वास्थ्य तथा जनसंख्या मन्त्रालय व्यवस्थापन महाशाखा अन्र्तगत आपूर्ति शाखा प्रमुख उपेन्द्र ढुंगानाले शुक्रबार कोभिडविरुद्धको मोडेर्ना खोप आउन लागेको जानकरी दिएका हुन् ।
उनले कोभ्याक्स सुविधा अन्तरगर्त एक लाख ८८ हजार मात्रा खोप आउन लागेको जानकारी दिए । अमेरिकी कम्पनीले उत्पादन गरेको मोडेर्ना खोप माइनस १५ देखि २५ डिग्री तापक्रममा भण्डारण गर्नुपर्ने हुन्छ । मोडेर्ना खोप फाइजर जस्तै १८ वर्ष मुनिका बालबालिकालाई पनि दिन सकिन्छ । तर नेपालमा आउन लागेको खोप कसलाई दिने भन्ने विषयमा केही पनि निर्णय हुन सकेको छैन ।
थप नौ लाख ७२ हजार मात्रा कोभिशिल्ड आइपुग्यो
बुधबार नेपालमा थप नौ लाख ७२ हजार मात्रा कोभिशिल्ड खोप ल्याइएको छ । सरकारलाई कोभ्याक्स सुविधा अन्तर्गत प्राप्त भएको थप नौ लाख ७२ हजार खोप काठमाडौँ आइपुगेको हो । दुई दिनअघि पनि कोभ्याक्स सुविधा अन्तर्गतको सात लाख २५ हजार मात्रा खोप आएको थियो । कोभ्याक्स सुविधा अन्तर्गत नेपालले पाउने ६० लाख मात्रा खोपको निरन्तरतामा नौ लाख खोप आएको हो ।
व्यवस्थापन महाशाखा अन्तर्गत आपूर्ति शाखा प्रमुख उपेन्द्र ढुंगानाले ६० लाख खोपमध्ये पहिलो पटक सात लाख २५ हजार र बुधबार दोस्रो पटक थप नौ लाख ७२ हजार मात्रा खोप आएको जानकारी दिए । उनले आगामी मङ्गसिरमा कोभ्याक्स सुविधा अन्तर्गत नै थप ६ लाख डोज कोभिसिल्ड आउन लागेको बताए ।
