निर्वाचन आयोगले प्रधानमन्त्रीलाई बुझायो प्रतिवेदन
काठमाडौं । निर्वाचन आयोगले सरकारलाई प्रतिनिधिसभा सदस्य निर्वाचनको मत परिणामसहितको प्रतिवेदन बुझाएको छ । ..
बालुवाटारमा निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारी नेतृत्वको टोलीले आइतबार प्रधानमन्त्री सुशीला कार्कीलाई प्रतिनिधिसभा सदस्य निर्वाचनको मत परिणामसहितको प्रतिवेदन हस्तान्तरण गरेको हो ।
प्रतिवेदन ग्रहण गर्दै प्रधानमन्त्री कार्कीले निर्वाचन सफलतापूर्वक सम्पन्न गरेकोमा आयोगप्रति आभार व्यक्त गरिन् । आयोगले गरेको कामलाई इतिहासले धेरै उच्च मूल्यांकन गर्ने प्रधानमन्त्री कार्कीले बताउनुभएको गृहमन्त्री ओमप्रकाश अर्यालले जानकारी दिए ।
हालैको निर्वाचन सुशासनको हिसाबले अहिलेसम्मकै सबभन्दा राम्रो निर्वाचन भएको महशुस सरकारले गरेको गृहमन्त्री अर्यालले बताए ।
सो क्रममा निर्वाचन आयोगका कार्यवाहक प्रमुख निर्वाचन आयुक्त भण्डारी, आयुक्तहरू डा. जानकी कुमारी तुलाधर र सगुन शम्शेर जबरा तथा आयोगका सचिव कृष्णबहादुर राउतलगायतका साथै गृहमन्त्री तथा कानुनमन्त्रीलगायतको उपस्थिति रहेको थियो ।
