संयुक्त राष्ट्रसंघीय मानवअधिकार परिषदबाट रुस निलम्बित
संयुक्त राष्ट्रसंघीय मानवअधिकार परिषद (युएनएचसिआर) बाट रुस निलम्बित भएको छ।संयुक्त राष्ट्रसंघको महासभाले बिहीबार रुसलाई युएनएचसिआरबाट निलम्बित गर्ने पक्षमा मतदान गरेको हो । युक्रेन युद्धमा ‘युद्ध अपराध’ र अत्याचार गरेको आरोपकाबीच रुसलाई युएनएचसिआरबाट निलम्बित गरिएको हो ।
बिहीबार संयुक्त राष्ट्रसंघमा भएको मतदानमा ९३ देशले रुसलाई निलम्बित गर्ने पक्षमा मत दिएका हुन् । २४ देशले विपक्षमा मत दिँदा ५८ देश भने अनुपस्थित रहे ।
रुसले युक्रेनमा अन्तर्राष्ट्रिय मानवीय कानुनको गम्भीर उल्लंघन गरेको तथा नियोजित रुपमा मानवअधिकार विपरित काम गरेको हुनुसक्ने प्रति गम्भीर ध्यानाकर्षण भएको संयुक्त राष्ट्रसंघले जनाएको छ ।
अमेरिकी राष्ट्रपति जो बाइडेनले रुसलाई युएनएचसिआरबाट निलम्बित गरिनु स्वागत योग्य रहेको बताएका छन् । यसले युक्रेनमा रुसी युद्धका कारण भएको अपराधको गम्भीरतालाई पनि देखाउने उनले उल्लेख गरेका छन् ।
